Грчкиот министер за заштита на граѓаните, Михалис Хрисохоидис, изјави дека во судските објекти во Атина, каде што вчера се случија вооружени напади, постоел безбедносен пропуст. Тој истакна дека и покрај тоа, Грција останува стабилна и безбедна земја. Во интервјуто за телевизија „Action 24“, Хрисохоидис укажал на тоа дека недостасуваат рендгенски уреди и соодветен персонал за контрола при влез, што претставува слабост во системот за обезбедување.
Хрисохоидис истакна дека е неопходна подобра организација на безбедносните процедури, но го отфрли заклучокот дека инцидентите влијаат на општата безбедносна ситуација во земјата. Според него, се работи за изолиран случај со опасен поединец, а не за поширок безбедносен проблем.
Во вооружените напади полесно се повредени пет лица, а сторителот, 89-годишен маж, беше уапсен во Патра. Според информациите, тој влегол со ловечка пушка во објект на Националниот фонд за социјално осигурување и во Апелацискиот суд во Атина, по што бил пронајден и приведен во близина на пристаништето. Министерот додаде дека полицијата брзо реагирала за да се избегне поголема опасност и најави анализи за унапредување на безбедносните мерки во слични институции.
