Можност за патување со воз низ Европа за младите
Европската комисија повторно ја отвора иницијативата за патување со воз низ Европа, наменета за младите. Овој пат, ќе бидат доделени повеќе од 40.000 карти за лица родени помеѓу 1 јули 2007 и 30 јуни 2008 година, а право на учество имаат и млади од Македонија.
Пријавувањето е можно и за лица кои не наполниле 18 години, но мораат да бидат полнолетни пред почетокот на патувањето. Младите можат да се пријават индивидуално или во групи од најмногу пет членови преку Европскиот портал за млади, со рок до 22 април напладне. По пријавувањето, учесниците ќе треба да решат краток квиз за општо знаење за Европската унија, како и едно прашање за проценка.
По завршувањето на процесот на пријавување, Комисијата и Извршната агенција за европско образование и култура ќе ги разгледаат пријавите. Победниците ќе имаат можност бесплатно да патуваат со воз низ Европската унија во периодот од 1 јули 2026 до 30 септември 2027 година. Патувањето може да трае до 30 дена, при што најмногу седум дена може да бидат искористени за патување со воз.
Од почетокот на оваа популарна програма, повеќе од 1,9 милиони млади се пријавиле, а околу 431.931 од нив веќе добиле карти.
