Индустриските производствени цени во еврозоната за февруари забележале пад од 0,7% на месечно ниво, а во Европската Унија намалувањето изнесува 0,5%, според најновите податоци на Евростат. Сепак, тековните геополитички настани, особено конфликтот со Иран, би можеле да го променат трендот веќе со статистиката за март.
На годишно ниво, производствените цени се намалиле за 3% во еврозоната и за 2,7% во Европската Унија. Главен фактор за падот во февруари е енергетскиот сектор, каде цените во еврозоната се пониски за 2,4% во однос на јануари. Без енергетските производи, индустриските цени бележат благ пораст од 0,1%. Зголемувањето е забележано кај интермедијарните блага и капиталните добра, секое со пораст од 0,3%, како и кај трајните потрошувачки добра со 0,2%.
Поединечно, најзначителен месечен пад е забележан во Шпанија со 3,1%, Ирска со 2,6% и Португалија со 1,8%. Притоа, највисок раст има во Хрватска со 3,8%, Финска со 2,7% и Литванија со 1,8%.
На годишна основа, енергетскиот сектор повторно игра клучна улога, со пад од 11,7% во еврозоната, додека другите категории бележат умерен пораст, како трајните потрошувачки добра со 2,5% и капиталните добра со 1,6%. Податоците укажуваат на тоа дека притисоците врз производствените цени на почетокот од годината биле релативно слаби, но активностите на глобалната сцена би можеле да го промени тој тренд во блиска иднина.
