Нема подобар начин за промоција на една земја од силна туристичка понуда. Според најавите, најмалку еден чартер лет дневно и меѓу 180 и 200 туристи ќе пристигнуваат во Македонија надвор од главната сезона. До крајот на годината, очекувањата се дека над 35.000 туристи само преку чартер-летови од Германија ќе ја посетат земјата. Ова денеска го истакна вицепремиерот и министер за транспорт, Александар Николоски, на промоцијата на првиот чартер-лет со туристи од Германија, кој пристигна на Меѓународниот аеродром Скопје.
Како што нагласи вицепремиерот, ова е првпат Македонија да привлекува туристи од Европа во периоди надвор од традиционалната летна и зимска сезона. Оваа иницијатива претставува силен поттик за развој на туризмот и локалната економија.
„Ова е значителен чекор напред за македонскиот туризам. Со заеднички напори на Владата, тур-операторите и ТАВ Македонија, успеавме да воспоставиме линија за привлекување туристи во периоди кога бројката на гости во земјата е значително помала.Само оваа година, во периодите меѓу февруари-мај и октомври-декември, ќе имаме 35.000 туристи. Тоа значи дека овие туристи ќе престојуваат во нашите хотели, ќе јадат во нашите ресторани, ќе ги посетуваат нашите знаменитости, ќе купуваат сувенири, ќе го вкусуваат македонското вино и традиционалната кујна и ќе ја шират приказната за Македонија како атрактивна туристичка дестинација. Секој ден барем еден авион ќе пристигнува на скопскиот аеродром, носејќи 180-200 патници кои ќе ја откријат убавината на нашата земја“, изјави вицепремиерот Николоски.
Дополнително, тој најави дека веќе од следниот месец ќе стартуваат и летовите субвенционирани од Владата преку Министерството за транспорт и врски.
„Започнуваат првите летови од програмата за субвенционирање, со десет линии од скопскиот и охридскиот аеродром. Очекуваме нивниот број да се зголемува. Веќе можам да најавам дека ‘Туркиш ерлајнс’ ќе започне со летови од 27 март, а ‘Визер’ ќе ја воведе линијата Базел – Охрид“, додаде Николоски.
Тој најави и реконструкција на терминалната зграда на охридскиот аеродром, која треба да започне во наредните два месеци. Оваа инвестиција ќе помогне Охрид да стане уште попривлечна дестинација за странските туристи и да го зголеми капацитетот за влез на нови туристички групи.
Со овие чекори, Македонија се позиционира како се поатрактивна туристичка дестинација, правејќи значителен исчекор во развојот на туризмот и економијата.
