Модниот викенд Скопје 32: Платформа која ја поврзува модата со иднината
Интернационалниот институт за мода „Изет Цури“ ја започна програмата со колекции изработени од студентите Рејхана Винца, Мирадије Селими и Дорунтина Каштанјева. Нивните дела беа комплетни и зрели изрази на креативноста, со јасно структурирани облини, прецизна контрола на силуетите и изразено чувство за материјал, врз основа на што нема простор за случајност. Оваа презентација не беше само демонстрација на потенцијал, туку и убедлив доказ за веќе изградена и стабилна основа.
Програмата не само што се отвори кон нови можности, туку и поттикна размислување за модата како систем.
Јавниот разговор „3D и AI во модата“, реализиран во рамките на Erasmus+ иницијативата Green DigiFashTechManager, претставува двегодишен европски проект финансиран од Европската Унија, во соработка со Green Land Group, Македонското модно здружение и Fashion Weekend Skopje. Овој разговор беше важен интелектуален сегмент на денот и постави основни прашања за индустријата: што значи авторство во ерата на вештачка интелигенција и како се трансформира физичката облека во дигитален производ.
Настанот беше дополнет со изложба „3D & AI во модата“, која даде увид во актуелните практики на пресекот помеѓу модниот дизајн, 3D технологијата и вештачката интелигенција, со акцент на новата генерација дигитални креативци.
Текстилниот инженер и 3D моден дизајнер Ангела Доневска ја отвори програмата со својата колекција “Deep Within – Hologram Collection” во соработка со Neonflex. Колекцијата е визуелен експеримент кој комбинира дигитална мода со бруталистички стил, поставувајќи прашања за границите помеѓу уметничкиот израз и технолошките ограничувања.
Директорката на Семос Едукација, Ангелина Канчевска, ги истакна можностите на вештачката интелигенција во едукацијата и дизајнот. Во соработка со Fashion Weekend Skopje, 17 студенти и алумни од Академијата за графички дизајн создадоа над 33 креативни решенија за визуелниот идентитет на FWSK32, користејќи AI алатки и дигитални медиуми. Официјалната насловна визуализација, за која е одговорна Едита Зекировиќ, потврди дека новиот визуелен јазик активно се развива.
Модниот дизајнер Никола Ефтимов ја надополни дискусијата со својот проект “The Vein of Light”, отворајќи прашања за улогата на AI не само како техничка асистенција, туку и како активен учесник во креативниот процес.
Значајна е и презентацијата на европскиот проект Just Fashion, претставен од Даниела Милошеска, креативен директор на Bastet Noir. Овој проект се фокусира на развој на одржливи производствени модели преку дигитални алатки, вклучувајќи виртуелна кастомизација и дигитално прототипирање, со цел да се унапреди made-to-measure пристапот во модата.
Со овој сегмент, Fashion Weekend Скопје 32 ја потврди својата улога како платформа која не само што ја презентира модата, туку активно учествува во нејзината трансформација преку образование, технологија и интердисциплинарен пристап.
Настанот заврши со промоција на книгата „Облеката и модата, од историјата до денес“ од Зорка Тодорова-Младеновиќ, чиј долгогодишен труд претставува еден од ретките систематизирани записи за развојот на модата во поширок културен и историски контекст. Нагласувајќи дека секоја трансформација има свои корени, нејзиното присуство потсети на важноста на знаењето оставено од предходниците.
Во вториот дел од настанот, сцената се врати на пистата, но со нов контекст. Факултетот за арт и дизајн при Европскиот универзитет – Скопје, преку ревијата „Еклиптика“, донесе визуелна храброст и генерациска слобода, без стремеж кон комерцијалност.
Групната ревија на Марија Станојовска и Маригона Рахмани ја стабилизираше оваа енергија. Пристапот на Станојовска беа контролиран и речиси архитектонски, додека Рахмани донесе мекост, елеганција и текстура. Овој дел од програмата функционираше како премин од колективна експресија кон индивидуален авторски израз, водечка до завршницата.
Олгица Ѓоргиева со колекцијата „Metamorfosis“, поддржана од Nera Caffe, понуди уверлива завршница. Инспирирана од личната трансформација и симболиката на пеперутката, колекцијата се развива преку минималистички силуети и внимателно обликувани детали.
Fashion Weekend Скопје 32 успешно демонстрираше дека модата не функционира во изолирани кругови, туку дека се гради преку поврзување. Македонските дизајнери не се на маргините, туку во јадрото на разговорот.
Финалето на настанот потврди дека генерациите кои доаѓаат веќе се тука, а индустријата не се прашува дали ќе се трансформира, туку на кој начин.
