Астероидите долго време ги загрижуваат научниците, бидејќи иако Земјата веќе била погодена од таков објект, тоа не значи дека сме целосно безбедни. Вселената е исполнета со различни карпи, и некои од нив имаат патеки кои би можеле да доведат до судир со нашата планета. Еден таков астероид е Бену, кој неодамна беше цел на мисијата за собирање примероци.
Според најновите податоци, во септември 2182 година, постои мала можност Бену да се судри со Земјата. Шансата за тоа е 1 на 2.700, што претставува само 0,04 проценти, но не е нула, пишува Science Alert. Научниците од Јужна Кореја направија модели на можните последици од таков судир, разгледувајќи ги и споредбите со последниот голем удар што се случил пред 66 милиони години, кога изумреле диносаурусите.
Бену е значително помал од астероидот кој го предизвикал изумирањето на диносаурусите, но неговите потенцијални последици сѐ уште се сериозни. Астероидот, со дијаметар од 500 метри, би ослободил од 100 до 400 милиони тони прашина во атмосферата, што би нарушило хемиската рамнотежа во атмосферата и значително би го намалило количеството на сончева светлина што ја достигнува Земјата. Ова би имало сериозен ефект врз фотосинтезата и глобалната клима.
Симулациите покажуваат дека температурите на планетата ќе опаднат за 4 степени Целзиусови, а врнежите ќе се намалат за 15 проценти. Озонската обвивка би била осиромашена за 32 проценти, што би имало катастрофални последици за животот на Земјата. Овие промени би го нарушиле растењето на растенијата, со што би се предизвикал пад на фотосинтезата во копнените и морските екосистеми, што би довело до значителни нарушувања во глобалното производство на храна.
Меѓутоа, не е сè толку мрачно. Алгите во океаните би можеле побрзо да се опорават од растенијата, а со помош на хранливите материи од прашината која астероидот ќе ја ослободи, можат дури и да пораснат повеќе отколку под сегашните климатски услови. Овие промени би можеле да претставуваат начин за ублажување на проблемите со снабдувањето со храна.
Во исто време, иако невозможно е точно да се предвиди колку пати Земјата била погодена од големи астероиди во минатото, истражувањата покажуваат дека тоа не е нешто ретко. Заедно со другите геолошки процеси, овие настани оставаат малку траги. Но, еден ваков удар би можел да доведе до радикални промени во животот на Земјата. Научниците проценуваат дека астероиди со средна големина се судираат со Земјата на секои 100.000 до 200.000 години, што значи дека предците на современите луѓе можеби веќе искусиле некои од овие глобални промени, кои можеби влијаеле на човечката еволуција.
