Министерството за внатрешни работи објави дека е поднесена кривична пријава против поранешниот министер Оливер Спасовски поради сомневање за злоупотреба на службената должност. Според податоците, Одделот за сузбивање на организиран и сериозен криминал на 9 декември 2025 година испратил кривична пријава до Основното јавно обвинителство во Скопје против О.С. (49) од Куманово.
Сомнението се однесува на тоа дека, додека ја обавувал функцијата министер за внатрешни работи во 2021 година, О.С. овозможил приватен оператор за технички преглед во општина Сарај да стекне неправна имотна корист во висина од 5.565.927 денари, што е спротивно на законот.
Според информациите од МВР, поранешниот министер ја искористил својата службена позиција и намерно не донел решение за одземање на овластувањето на правното лице, иако надлежната организација навремено поднела предлог за тоа. Законската обврска предвидува донесување решение во рок од најдоцна 15 дена по приемот на предметот, но О.С. не постапил согласно член 65 став 3 од Законот за возила и член 5 од правилникот за постапката за издавање и одземање на овластувања за технички преглед.
Поради овие пропусти, техничкиот центар продолжил да работи без санкции, со што, според пријавата, била овозможена значителна незаконска добивка.
