Лидери на партии ќе дискутираат за реформи и укинување на техничката влада
Утре, во Клубот на пратениците, ќе се одржи лидерска средба иницирана од премиерот Христијан Мицкоски. На состанокот ќе присуствуваат лидерите на парламентарните партии, а главна тема ќе биде укинувањето на техничката влада. Покрај тоа, ќе се разговара и за Изборниот законик, изборот на народен правобранител и пакетот реформски закони од областа на правосудството.
Според најавите, дневниот ред може да биде дополнет со дополнителни предлози од учесниците. Досега, единствена опозициска партија која потврди учество е Левицата. Лидерот на СДСМ, Венко Филипче, одбил да учествува на средбата, нагласувајќи дека власта бара оправдување за предвремени избори.
Од владејачката коалиција, на состанокот се очекува присуство на претседателот на ЗНАМ и градоначалник на Куманово, Максим Димитриевски, како и градоначалникот на Тетово, Биљал Касами, од коалицијата „Вреди“. Оваа коалиција најави учество со својот лидер и координатор на пратеничката група, Беким Ќоку.
ДУИ сè уште не донела одлука околу учеството на својот лидер, Али Ахмети, по денешната седница на Генералниот совет, на која се разгледуваат актуелните политички ситуации и внатрепартиски прашања.
Левицата изрази поддршка за укинување на техничката влада, но само доколку се воведе една изборна единица. Пратеникот Амар Мециновиќ истакна дека е време за конструктивен дијалог за клучните државни прашања.
ЛДП и ДОМ исто така ја поддржаа идејата за средбата, потчекувајќи дека нејзината цел не е само техничката влада, туку и решавање на суштинските проблеми кои влијаат на животот на граѓаните. ДОМ ги повика учесниците да разгледаат поширока агенда, која вклучува формирање на една изборна единица и отворени листи без изборен праг.
Премиерот Мицкоски нагласи дека средбата е важна пред неговото учество на Светскиот економски форум во Давос и дека уставните и системски промени, како што е укинувањето на техничката влада, треба да бидат извршени со широка политичка согласност. По одбивањето на СДСМ да учествува, Мицкоски изрази разочараност и потенцираше дека власта има доволно пратеници за укинување на техничката влада, но останува отворен за инклузивен процес и поширока дебата за важни закони и европски реформи.
