Информација од директорот на водоснабдителното претпријаќе во Струга
Директорот Јованчо Мечкароски информира дека на терен излегле инспектори од Агенцијата за храна и ветеринарство, како и од комуналното претпријатие, и дека изворите не се во опасност откако угинатото животно било веднаш отстрането.
„Имајќи го предвид случајот, инспекторите веднаш реагираа и по извршениот увид, угинатото животно беше подигнато. Сопственикот беше пронајден преку чипот што го имаше коњот, а институциите ќе ги преземат сите потребни законски мерки“, изјави Мечкароски.
Тој истакна дека Струга во моментов се снабдува со вода од изворите во Горна Белица, со доток од 380 литри во секунда и матност од 0,6 НТУ.
Ситуацијата, како што соопшти Општина Струга, дополнително се комплицира поради врнежите од дожд, кои можат да пренесат токсини и опасни материи од угинатото животно до изворот, создавајќи потенцијален ризик од загадување.
„Изворот Шум е подрачје од особено значење за природата и секоја неодговорна постапка претставува сериозна закана за екосистемот и за здравјето на граѓаните. Сепак, надлежните институции информираат дека водата е безбедна за пиење и мониторингот на состојбата на теренот континуирано ќе се спроведува за да се избегне каков било ризик“, пишува во соопштението.
Фрлањето угинати животни на отворени површини и во близина на водни извори, според Општина Струга, не е само неодговорно, туку и директна опасност за јавното здравје и животната средина.
