Со овој меморандум, Министерството за јавна администрација на двете земји ја унапредува својата соработка во важни области како што се дигитализацијата на јавните услуги, управувањето со човечките ресурси, добро управување, транспарентност и професионализација на јавната администрација.
„Овој документ не е само формалност – тој е патоказ за заедничка иднина, за зајакнување на институционалните капацитети и ново поглавје во билатералните односи помеѓу Република Македонија и Црна Гора“, изјави министерот Минчев.
Меморандумот предвидува размена на искуства, експертиза и најдобри практики, како и заедничка реализација на проекти поддржани од Европската Унија и меѓународни партнери.
Целта е да се придонесе кон создавање на поефикасни, транспарентни и граѓански ориентирани институции.
„Реформата на јавната администрација не е само внатрешна обврска, туку и надворешен сигнал – дека нашите институции се подготвени за европските стандарди, за модерно управување и вистински партнерства во регионот“, нагласи Минчев.
Тој изрази благодарност до црногорските домаќини за нивното партнерство и за споделената визија за модерна, резултат-ориентирана администрација која ќе биде во служба на граѓаните.
„Од Подгорица испраќаме заедничка порака: јавната администрација мора да биде двигател на интеграцијата, не нејзина пречка. Професионализмот, транспарентноста и ефикасноста не се луксуз, туку предуслов за стабилност, економски развој и членство во ЕУ“, се наведува во соопштението, додавајќи дека оваа соработка е значаен чекор кон зацврстување на регионалните врски и заедничкото приближување кон европската иднина.
