Во Скопје се одржа 4. Форум за културна дипломатија „Скопје 2026“, насловен „Од крстопати кон поврзувања: Културната дипломатија и иднината на глобалниот дијалог“. Министерот за култура и туризам, Зоран Љутков, се обрати на тематската сесија „Визија за иднината: Скопје 2028 и моќта на креативноста“, која се одржа во Музејот на Град Скопје. Тој нагласи дека културата е клучен двигател на современото општество и важен инструмент на културната дипломатија.
„Културната дипломатија отвора простор за комуникација помеѓу државите, не само како политички субјекти, туку и како цивилизации со сопствена меморија, етика и креативна визија. Токму низ ова строго се размислува за значењето на титулата Скопје – Европска престолнина на културата за 2028 година“, истакна Љутков.
Министерот посочи дека Европа денес има потреба од градови кои знаат да создадат визија за заеднички живот, пренесувајќи културата како јавна вредност и различноста како општествен капитал. Оценувајќи го потенцијалот на Скопје, тој рече дека градот е уникатен простор на повеќеслојна културна и цивилизациска интеракција, додека неговата автентичност резонира од сложеноста и способноста да создава дијалог помеѓу различни традиции и идентитети.
Во своето обраќање, министерот се осврна и на напорите за враќање на културното наследство кон јавноста, посочувајќи на важноста на Скопското Кале, Скопскиот аквадукт и археолошкиот локалитет Скупи како клучни простори за новиот културен развој на градот.
„Вистинскиот успех на Скопје 2028 не ќе се мери само преку бројот на посетители или настани, туку и преку тоа дали Скопје успеало да создаде нов модел на културна комуникација и дали културата ќе стане долгорочна општествена стратегија“, додаде тој.
Љутков увери дека градовите кои инвестираат во култура всушност инвестираат во својата интелектуална иднина, а културната дипломатија е процес кој ја наметнува заедницата преку своите вредности, идеи и начини на комуникација со светот. Министерот изрази уверување дека Скопје 2028 ќе биде креативен момент во кој главниот град ќе ја претвори културата во најсилен дипломатски јазик, своја европска биографија и долготрајна иднина.
