Линдзи Вон, американската алпска скијачка и една од најдобрите во историјата, ќе го одржи својот последен настап во професионалната кариера.
На 41-годишна возраст, таа претрпе сериозна повреда на коленото непосредно пред стартот на Зимските олимписки игри, но сепак планира да се појави на стартот во недела, во 11:30 часот, за своето последно спуштање.
На „Инстаграм“, Линдзи сподели емотивен пост, потврдувајќи дека нејзиниот пат во спортот се завршува:
„Ова е уште еден, последен спуст…
Само присуството на олимписките игри беше вистинско патување – патување во кое многумина не веруваа од самиот почеток. После шест години во пензија, ја добив шансата повторно да се натпреварувам благодарение на делумната замена на коленото.
Но зошто? Сите ми го поставуваат тоа прашање. Мислам дека одговорот е искрен – затоа што го обожавам алпското скијање.
Не се плашам од животот по спортот. Не барам смисла, внимание или пари. Знам која сум и од што сум направена. Јас сум резултат на неверојатни родители кои ми покажаа дека трудот и истрајноста се клучни. Мајка ми, која сега ме следи одозгора, ми ја предаде силата на позитивното размислување и упорноста. Татко ми, кој утре ќе биде на трибините со семејството и пријателите, ме научи што значи да се работи и колкава важност има менталната сила.
Утре ќе стојам на стартната линија со сознание дека сум силна. Со вера во себеси. Сознавајќи дека шансите не ми одат во прилог – поради годините, поради недостатокот на преден вкрстен лигамент и со титаниумско колено – но знаејќи и дека сè уште верувам. Токму во оние моменти кога изгледа дека шансите се минимални, обично извлекувам најдобро од себе.
Утре ќе ја возам својата последна олимписка спуст-трка и, иако не можам да гарантирам добар резултат, можам да ветам дека ќе вложам сè од себе. Без оглед на конечниот исход – јас веќе победив.
Поддршката и љубовта што ги добив во последно време беа неодоливи – на најубав можен начин. Ми дадоа енергија и ми помогнаа многу повеќе одошто можам да изразам. Ви благодарам.“ – напиша Линдзи Вон.
