Американскиот државен секретар Марко Рубио денеска официјално го објави укинувањето на Агенцијата за меѓународна развојна помош на САД (УСАИД). Оваа одлука следи по брзото затворање на агенцијата откако претседателот Доналд Трамп повторно зазеде местото во Белата куќа.
Студија објавена во медицинското списание „Лансет“ предвидува дека укинувањето на американската помош би можело да доведе до дополнителни 14 милиони смртни случаи низ целиот свет, вклучувајќи 4,5 милиони деца, потврдува „Хил“.
Администрацијата на Трамп образложи дека затворањето на УСАИД има за цел да елиминира „расфрлање, измами и злоупотреби“ и да пренасочи американските средства кон програми со конкретни резултати.
Рубио нагласи дека децениската американска надворешна помош не донела желените резултати. „Развојните цели ретко биле постигнати, нестабилноста често се влошувала, а антиамериканските чувства само растеле“, напиша тој во својот блог. „Ерата на владино санкционирана неефикасност официјално заврши“, додаде.
Демократските членови на Конгресот остро го критизираа укинувањето, нарекувајќи го неуставно и сурово. Администрацијата ги замрзна средствата за надворешна помош и им го блокираше пристапот на вработените во УСАИД до работните станици и е-поштата. Овие мерки создадоа хаос во хуманитарната заедница и ги загрозија животите на многумина, според тужба поднесена против администрацијата, истакнува „Хил“.
„Наместо да се вклучат во конструктивен дијалог за ублажување на катастрофалните последици од овие отпуштања, администрацијата избра да генерира дополнителни тешкотии преку сомнителни, можеби незаконски политики, проследени со омаловажувачка и дехуманизирачка реторика“, се наведува во изјавата на Американската асоцијација на службеници за надворешни работи, синдикатот на дипломатите.
Според анализа на „Њујорк Тајмс“, од 120 милијарди долари во активни договори на почетокот на јануари, 69 милијарди долари се задржани за програми, вклучувајќи 580 хуманитарни и 167 здравствени програми, како и 65 програми за економски развој.
Рубио изјави дека УСАИД „официјално ќе престане да спроведува надворешна помош“, а Стејт департментот ќе ја преземе распределбата на помошта. Тој увери дека помошта ќе се спроведува со „поголема одговорност, стратегија и ефикасност“.
Оваа одлука беше позитивно примена од дел од поддржувачите на Трамп во Конгресот. „Америка на прво место: секој долар, секој дипломат. Благодариме на претседателот Трамп и секретарот Рубио за вашето лидерство“, напиша републиканското мнозинство во Комитетот за надворешни работи на Претставничкиот дом.
Противниците предупредија дека администрацијата прави погрешен потег во надворешната политика. „Укинувањето на УСАИД е историска грешка и ќе ја ослаби позицијата на САД во светот, особено во однос на конкуренцијата со Кина“, изјави Р. Николас Брнс, поранешен амбасадор на САД во Кина.
Според медиумите, поранешниот претседател Џорџ Буш присуствувал на церемонијата во чест на вработените во УСАИД, одбележувајќи го последниот ден на агенцијата. Тој изрази загриженост за иднината на Претседателскиот план за итна помош против СИДА, програма која спаси околу 25 милиони животи. „Дали е во наш интерес што 25 милиони луѓе кои ќе умреа сега се живи? Мислам дека е“, рече Буш. „Во име на благодарна нација, ви благодарам за вашата напорна работа и Бог да ве благослови“, заврши тој. (МИА)
