Новата песна на Коктел: „Само ти“ – Чисто поп рок бонбонче

На крајот на 2025 година, „Коктел“ ја започнаа својата музичка авантура со новото албумче „Каде ти, таму јас“. Сега, поп рок дуото од Македонија, составено од Стевче Грозданов и Блаже Темелков, ја продолжува својата мисија со новата песна „Само ти“. Оваа песна го отсликува нивниот уникатен стил и музикувањето, кое трае веќе 30 години.

„Само ти“ е ново поп рок парче, исполнето со енергичен ритам и лесно певлив рефрен. Како и досега, „Коктел“ успеваат да создадат хитовска мелодија која веднаш привлекува внимание и остава радосен впечаток. Нивниот автентичен звук, комбиниран со виртуозни гитарски сола, дава дополнителна димензија на песната.

Парчето наликува на класични ЈУ хитови, кои многумина ќе ги потсетат на младешките години. Без претерано обработени вокали или вештачки звуци, песната е исполнета со природна енергија, а Блаже го отелотворува своето искрено и емоционално изразување. Гитарата на Стевче, пак, во секој акорд носи длабоки емоции.

Видеото за песната е едноставно, но многу ефектно, со моменти на романтика, особено кога на сцена се појавуваат Светлана и Мики Црнокрак – познатата модно-брачна двојка, кои првпат се појавуваат заедно во музички спот. Оваа приказна дополнително ја зајакнува темата за вистинската љубов која може да трае, без разлика на популарноста на луѓето.

Музиката и текстот на „Само ти“ се дело на Блаже Темелков, додека аранжманот е на Стевче Грозданов, кој потпишува и видеоспотот. Миксот и мастерингот се направени од Горан Гешовски.

„Само ти“ е уште едно потврдување на музичката магија на Коктел – редок спој на традиција и современост.