Во рамките на иницијативата „Подари книга, подари свет“, на Меѓународниот ден на мајчиниот јазик, „Матица македонска“ и компанијата „Алкалоид“ реализираа донација на капитални дела во областа на македонистиката за Катедрата за македонски јазик и книжевност при Филозофскиот факултет во Љубљана.
Во академската 1961/1962 година, Љубљана стана дом на првиот Лекторат по македонски јазик во светот, а во 1984/1985 година прерасна во Катедра за македонски јазик и книжевност, која и денес е активен дел од Одделот за славистика. Како дел од прославата на 65-годишнината од основањето на Лекторатот, донацијата од „Матица“ и „Алкалоид“ е прва ваква поддршка упатена од Македонија кон љубљанската Катедра по овој повод.
– Овие публикации ќе бидат од големо значење за студентите кои ја изучуваат македонистиката во сите три циклуси на студии. Исто така, тие ќе поттикнат нови истражувања, анализа и научни согледби, отварајќи нови перспективи за афирмација на македонскиот јазик, книжевност и култура – нагласи проф. д-р Намита Субиото, раководителка на Катедрата за македонски јазик и книжевност во Љубљана.
Филозофскиот факултет во Љубљана, во 1960 година, прв во некогашниот југословенски образовен систем, распиша конкурс за лектор по македонски јазик, иако македонистиката се изучувала и на универзитетите во други земји. Академиците Блаже Конески и Харалампие Поленаковиќ испратија стручна оцена за кандидатот Блаже Ристовски, кој стана првиот лектор по македонски јазик и со тоа ја започна историјата на словенечката македонистика. Под водство на проф. д-р Драги Стефанија, ученик на Конески, Лекторатот прерасна во независна Катедра, која денес, под управување на проф. д-р Намита Субиото, е еден од најпрепознатливите академски центри за македонистика во светот.
Донацијата од „Матица македонска“ и „Алкалоид“ вклучува скоро сè од трудовите на академик Блаже Ристовски, како и многу други важни публикации – клучни студии за македонскиот јазик и книжевност, монографии за македонската култура, избори од делата на најзначајните македонски писатели, антологии на современата македонска поезија, проза и драма, како и историографска литература.
