Надлежен јавен обвинител од Основното јавно обвинителство Штип денеска направи увид во Вишото јавно обвинителство во Скопје, при што беа собрани докази во постапката што се води за кривични дела поврзани со злоупотреба на службената положба и овластувањата, како и за малтретирање при извршување на службени обврски, поднесени против јавен обвинител.
Обвинителот заедно со стручните соработници од ОЈО Штип ги прегледаа и евидентираа податоците внесени во официјалната документација, при што се анализираше начинот на заведување и распределување на предметите. Воедно, беа споредени овие информации со исказите дадени од оштетените лица – пријавители, кои укажуваат на евентуални неправилности во распределбата на случаите, информираа од Јавното обвинителство на Република Северна Македонија.
Во соопштението беше нагласено дека увидот во документацијата е спроведен согласно важечките законски прописи, со цел да се обезбеди целосна правна транспарентност и почитување на законските процедури.
