Легендарниот голман на Баерн Минхен и германската репрезентација, Оливер Кан, изрази критики кон Реал Мадрид по реваншот во четвртфиналето на Лигата на шампионите.
Баварците славеа над Реал со 4:3 на „Алијанц Арена“, што им донесе вкупен резултат од 6:4 и ги смести помеѓу четирите најдобри тима во Европа.
Ден по мечот во Минхен, многумина се фокусираа на реакциите на играчите на Реал и на обвинувањата против судијата, Славко Винчиќ.
Во Мадрид, веруваат дека словенечкиот судија е главната причина за нивното елиминирање, особено откако му покажа вториот жолт картон на Едуардо Камавинга во 86-та минута, кога гостите водеа со 3:2.
„Потребно е да се преземат мерки за да се спречат ваквите ситуации. Не можат секогаш да поминуваат без последици. Кога работите не одат по нивно, сè завршува во хаос. Се однесуваат како да секоја правилна одлука на судија мора да биде во нивну корист“, изјави Кан.
„Не беше поинаку и сега. И претходно го правеа истото, а тоа е неприфатливо и мора да престане. Искрено, тоа многу говори за тоа како успеаја да освојат 15 титули во ова натпреварување.“
Фото/ Depositphotos
