Македонија оствари реми против Португалија со резултат 29:29 (13:15) во второто коло на Европското ракометно првенство.
Предводени од капитенот Филип Кузмановски, македонските ракометари ја задржаа шансата за пласман во следната фаза. Посебно се истакна голманот Томовски, кој во клучен момент одбрани два зицера во интервал од 20 секунди, спречувајќи ја Португалија да излезе со победа.
Текот на натпреварот беше многу динамичен и енергичен, особено во арената во Хернинг. Македонија поведе со 4:2, а Португалија се врати и до крајот на првото полувреме, двете екипи се менуваа со голови.
Сепак, финишот на првото полувреме и почетокот на второто донесоа проблеми за Македонија, кога Португалците постигнаа пет последователни голови.
Македонија се бореше до последната минута, а четири минути пред крајот резултатот беше изедначен на 26:26. Во преостанатото време, двете екипи постигнаа по три голови, а жалење е што нашите ракометари не добија можност за завршен напад за победа.
Кузмановски блесна со 15 погодоци, додека на другата страна, Кико Кошта се истакна со 11.
Во последното коло, следниот вторник, Македонија ќе се соочи со Романија, додека Португалија ќе игра против Данска.
Фото: EPA
