Основниот суд во Кавадарци донесе одлука да му изрече казна затвор од една година на 46-годишен жител, кој намерно прегази полициски службеник при обид за легитимирање. Ова го соопштија од Обвинителството.
Инцидентот се случил на 21 декември по полноќ. Обвинетиот, управувајќи возило тип “фолксваген”, не се запрел при знак од полициските службеници. Откако бил опколен од две полициски возила на крстосница, тој со возилото се залетал кон полицаецот, кој излегол од службениот автомобил за да го легитимира.
Според информациите од Обвинителството, обвинетиот го удрил полицаецот во стомакот и левата нога, по што продолжил да вози и удрил во полициското возило. Полицаецот претрпел повеќе телесни повреди.
Основното јавно обвинителство во Кавадарци поднесе обвинителен предлог против осомничениот за кривично дело “Напад врз службено лице при вршење работи на безбедноста”, согласно член 382 став 2 и став 1 од Кривичниот законик. Обвинетиот беше лишен од слобода на 25 декември и следниот ден беше изведен пред суд, каде го признал делото.
Со пресудата, судот го прогласи обвинетиот за виновен и му изрече казна затвор од една година, како и мерка притвор до правосилноста на пресудата, поради опасност од бегство и можност за повторување на делото.
