Фудбалската федерација на Македонија (ФФМ) денеска му изрече забрана за извршување функции во период од две години на поранешниот претседател Муамед Сејдини. Оваа одлука доаѓа поради негово учество во финансиска измама поврзана со проектот за изградба на стадионот во Охрид.
Сејдини е санкциониран поради неправилности при авансната исплата од околу 700.000 евра кон градежна компанија која беше задолжена за изградба на трибини на стадионот „Билјанини Извори“.
„Утврдено е дека на 27. ноември 2024 година, Одборот за итност на ФФМ донел одлука за прифаќање на понудата од ДПТУ „Енергоинвест Трејд“ ДОО Скопје за изградба на трибината во вредност од 202.919.610,00 денари, без услови за авансно плаќање. Истовремено, Сејдини бил овластен да потпише договор според прифатената понуда. Сепак, на 03. декември 2024 година, тој злоупотребил својата позиција и потпишал договор со услов за авансно плаќање од 20 проценти, што било извршено без соодветна банкарска гаранција“, се наведува во соопштението на ФФМ.
„Дисциплинската комисија утврди дека Муамед Сејдини го измамил Управниот одбор на ФФМ и нанесол значителна материјална штета на Федерацијата, поради што му е изречена соодветна дисциплинска санкција“, се додава во соопштението.
Сејдини ја водел ФФМ во два мандати, од 2019 до 2025 година.
