Филипче: Христијан Мицкоски дошол на власт со лаги и државата ја држи во изолација
Претседателот на СДСМ, Венко Филипче, обвини дека тековната власт, предводена од Христијан Мицкоски, дошла на позицијата со дезинформации поврзани со надворешната политика и името на државата, што довело до изолација на Македонија. Во својото учество во централниот Дневник на МТВ, Филипче истакна дека ВМРО-ДПМНЕ ветувало поништување на постоечките договори и враќање на старото име, но реализацијата на тие ветувања е недостапна.
„ВМРО-ДПМНЕ не говори вистина. Доколку тие остануваат на сегашните позиции, а нè обвинуваат за предавство, се поставува прашањето – дали и тие некоја форма на предавство? Тие велат ‘не чекор понатаму’. Што подразбираат со тоа? Ние ги заштитивме идентитетските одредници – јазикот, културата и националниот идентитет. Што правеа нивните ветувања? Ќе го сменеа името, немаше да го прифатат Преспанскиот договор, немаше да го користат новото име Северна Македонија. Зошто не го поништат договорот за добрососедство со Бугарија, како што ветуваа? Дали нивната кампања не беше лажна и со лаги дојдоа на власт?“ – вели Филипче.
Тој, исто така, нагласи колку е важно да се отворат преговорите со Европската Унија и укажа на економските бенефити кои ги добиваат соседните земји.
„Земјите од Западен Балкан годишно добиваат околу 6 милијарди евра, од кои приближно 1 милијарда се неповратни грантови од Европа. За истиот период, Хрватска и Бугарија добиле по 40 милијарди евра неповратна помош за развој. Зошто не сакаме да го направиме тој исчекор? Што за Мицкоски претставува национално предавство? Како уставните измени во кои ги вклучуваме Бугарите и Хрватите во нашиот Устав може да бидат национално предавство? Тоа е така, затоа што работи за интересите на Србија, Унгарија и преку тоа за Русија“, заврши Филипче.
