Претседателот на СДСМ, Венко Филипче, во текот на денешната прес-конференција нагласи дека граѓаните директно ги почувствуваат последиците од невниманието на премиерот Мицкоски. „Граѓаните плаќаат висока цена за лагите и неспособноста на Мицкоски. Нивните џебови и фрижидери остануваат празни“, истакна Филипче.
Тој потсети дека СДСМ навреме предупредуваше на неопходноста од конкретни решенија за справување со кризата, но Владата не презела никакви мерки. „Соработувавме и укажувавме дека е неопходно да се воведат конкретни мерки за поддршка на граѓаните. Уште пред два месеци, кога започна кризата на Блискиот Исток, премиерот и Владата не презедоа ништо. СДСМ предложи решенија, како што е намалувањето на ДДВ-то на горивата на 5%, а на основните прехранбени производи до 0%. Исто така, предложивме намалување на акцизите и преполовување на цената на патарините. Со вакви мерки, граѓаните ќе добиеја реални бенефити кои би се почувствувале во нивните семејни буџети“, рече Филипче.
Тој изрази загриженост и за одбивањето на предлозите од страна на Владата, која делумно вовела мерки, а сега се враќа на укинувањето на истите. „На жалост, премиерот и неговата коалиција ги игнорираа нашите предлози. Мерки што ги воведоа сега повторно се отстрануваат. Времето за дејствување е поминато, бидејќи цените во државата веќе значително се зголемија“, додаде Филипче.
Тој истакна дека реалноста всушност ја потврдува спротивната слика од онаа што ја претставува Владата. „Мицкоски продолжува да тврди дека сме трета економија во Европа. Но, дали граѓаните го чувствуваат тоа кога одат во продавница? Дали го чувствуваат кога ги плаќаат сметките? Одговорот е – не. Луѓето живеат многу полошо. Странските инвестиции се сведени на 60% помалку. Многу компании затвораат и отпуштаат работници. Во изминатите година и пол, 1.500 лица загубија работа. Дупката во буџетот се зголемува, а државата должи 160 милиони евра за враќање на ДДВ навреме на компаниите“, рече Филипче.
Дополнително, тој нагласи дека цените на основните производи се значително зголемени: „Лебот, брашното, шеќерот, солта, месото, млечните производи, овошјето и зеленчукот – сè е поскапено од 5 до 300%. Стандардот на граѓаните секојдневно се влошува. Говориме за економија која тоне, за тежок секојдневен живот, за цени во продавниците кои растат без никаква контрола, за најниски плати во Европа и за млади лица кои ја напуштаат нашата земја“, истакна претседателот Филипче.
Тој уште еднаш акцентираше дека СДСМ бара таргетирана поддршка за најранливите категории граѓани. „Ние продолжуваме да бараме замрзнување на цените на основните прехранбени производи, да се интервенира во ДДВ-то и да се донесат посебни мерки за поддршка на социјалните случаи, студентите, пензионерите, работниците со ниски примања, семејствата со повеќе деца и земјоделците“, заклучи Филипче.
