ФИЈУК – Саем на независна уметност во Трн
ФИЈУК ќе се одржи во сабота, 27 декември, од 14:00 до 18:00 часот, со изложба на Марко Печеновиќ насловена „Само напред“. Посетителите ќе имаат единствена прилика да се запознаат со творби на околу 30 независни уметници и креативни работници, кои ќе прикажат графики, илустрации, фотографии, принтови, книги, зинови, постери, текстил и авторски изданија.
Во недела, 28 декември, од 14:00 часот, Саемот на ФИЈУК ќе биде дополнет со најнови локални музички изданија и ќе се емитува програма од Радио Скопје – Канал 103. Оваа целодневна програма ќе вклучува архивски содржини, разговори и музички селекции поврзани со независната културна и општествена сцена. Исто така, во недела ќе се одржат две работилници за печатење и колажирање.
ФИЈУК досега се организираше на различни локации во Скопје, како и во Прилеп, Куманово и Гевгелија, предизвикувајќи голем интерес кај публиката. Саемот ги обединува учесниците од различни уметнички дисциплини, со цел да поттикне директна комуникација меѓу уметниците и публиката и да ја зајакне локалната независна продукција и културните заедници.
Саемот е отворен за сите љубители на уметноста, културата и алтернативните сцени, и ги повикува да се приклучат на дводневната програма во Трн. Поддржете ја локалната културна сцена!
