Поранешниот аргентински фудбалер и актуелен тренер на чилеанскиот клуб Универсидад де Чиле, Фернандо Гаго, беше итно опериран во Сантијаго, поради кардиоваскуларни проблеми. Ова се случи по победата на неговиот тим над О’Хигинс. Клубот соопшти дека Гаго е во добра здравствена состојба.
„Ве информираме дека нашиот тренер, Фернандо Гаго, помина низ серија кардиоваскуларни тестови и нема да управува со тренингот денес. Фернандо е во добра состојба и под надзор на нашиот медицински тим“, се вели во соопштението на клубот.
Гаго ги почувствува проблемите во четвртокот, откако неговиот клуб го совлада О’Хигинс со 2:0 во последниот натпревар од првиот дел на чилеанскиот шампионат.
Интересно е што чилеанскиот шампионат продолжува и покрај Светското првенство, бидејќи нивната репрезентација не успеа да се квалификува.
Според локалните медиуми, Гаго, познат и по прекарот Пинтита, беше пренесен во болница и опериран во текот на ноќта, а порталот „АДН“ објави дека пристигнал во болница околу три часот по полноќ.
Очекувањата се дека Гаго ќе ги пропушти претстојните обврски на тимот. Тој нема да може да ја предводи Универсидад де Чиле во првиот натпревар од Купот на Чиле, кој ќе се игра оваа недела против Сантијаго Вондерерс. Неговото место привремено ќе го заземе помошникот тренер Фабрицио Колочини.
Универсидад де Чиле е шестиот клуб во тренерската кариера на Гаго, по неговите ангажмани во Мексико и Аргентина, вклучувајќи го и неговиот период на водство со Бока Јуниорс во сезоните 2024 и 2025.
Во текот на кариерата, Гаго играше за Реал Мадрид, Рома и Валенсија, а исто така има одиграно 61 натпревар за аргентинската репрезентација.
Фото/ EPA
