Европската комисија објави дека високите цени на авионското гориво не можат да бидат основа за авиокомпаниите да ги избегнуваат своите обврски кон патниците при откажување летови. Според новите насоки усвоени од Комисијата за транспортниот и туристичкиот сектор на ЕУ, патниците и натаму имаат право на враќање на парите, пренасочување, помош на аеродром и обесштетување за откажаните летови во последен момент.
Во изјавата на портпаролката на Европската комисија, Ана Каиса Итконен, се објаснува дека авиокомпаниите можат да бидат ослободени од исплата на отштета само ако успеат да докажат дека летот е откажан поради вонредни околности, каква што е вистинскиот недостиг на гориво. „Високите цени на горивото не ги сметаме за вонредна околност“, нагласува Итконен.
Овие нови насоки се донесени поради глобалните тешкотии со снабдувањето со гориво и затворањето на дел од воздушните и поморските рути поврзани со кризата на Блискиот Исток. Документот исто така нагласува дека не е дозволено ретроактивно зголемување на цените на веќе продадените авионски билети преку дополнителни трошоци, како што се доплатите за гориво.
Во меѓувреме, Агенцијата за безбедност на воздухопловството на Европската Унија издаде безбедносен билтен поврзан со проблемите со снабдувањето со авионско гориво во Европа. Агенцијата истакнува дека кризата влијае на достапноста на горивото Jet A-1, кое е најчесто користено во Европа, отворајќи можност и за користење на американското гориво Jet A. Главната разлика помеѓу двата типа гориво е точката на замрзнување – за Jet A-1 таа е минус 47 степени Целзиусови, додека за Jet A изнесува минус 40 степени, што го прави првото посоодветно за долги летови и постудени климатски услови.
