Наслов: Камен-темелник за новата градинка „Пролет“ во Карпош
Премиерот Христијан Мицкоски денес, 20 јуни 2026 година, присуствуваше на поставувањето камен-темелник за новата градинка „Пролет“ во Општина Карпош. Како што беше истакнато, целта е да се обезбедат современи и достојни услови за згрижување и развој на најмладите.
Мицкоски нагласи дека секој ваков објект е значаен чекор напред – не само за подобри услови за децата, туку и како конкретна поддршка за родителите. Тој најави дека Владата ќе продолжи со проекти кои директно го унапредуваат квалитетот на живот, особено кога се работи за најмладите генерации. Според него, новата градинка ќе биде безбеден простор во кој децата ќе учат, ќе се дружат и ќе го поминуваат своето време квалитетно.
Општина Карпош е иницијатор на проектот за изградба на новиот, современ објект „Пролет 2“ во Козле, кој ќе се наоѓа на улицата Милан Марковиќ, на местото на стариот објект. Градинката е проектирана според современи стандарди за престој и развој на деца, со предвидена изградена површина од 1.156 м² и вкупно 1.949 м² простор за игра и зелени површини. Капацитетот на објектот ќе изнесува 130 деца.
Новата „Пролет“ ќе располага со зони за згрижување, административен дел, кабинети, чајна кујна, креативен простор и помошни простории. Предвидени се и подземен паркинг, лифт и кровна зелена тераса. Објектот ќе има седум занимални со сопствени санитарии и посебни тераси, како и сензорна соба и тоалет приспособен за деца со попреченост.
Заменик-градоначалникот Неделчо Крстевски истакна дека со реализацијата на овој проект, по долг период, општината добива нов, модерен објект во урбаниот дел на Карпош, наменет за најмалите жители. Според него, станува збор за инвестиција во иднината на децата и во место каде што тие ќе растат, ќе се развиваат и ќе создаваат спомени.
Вкупната вредност на инвестицијата изнесува 137.245.089 денари, обезбедени од Владата преку јавен повик на кој Општина Карпош аплицирала со сопствен проект. Рокот за завршување на градежните работи е 120 дена.
