Јубилеј на Лекарската комора: 34 години посветеност и отворање историско катче на медицината
Лекарската комора на Република Северна Македонија денес го одбележа значајниот јубилеј — 34 години од своето основање. Во рамките на свеченоста, во просториите на Комората беше отворено и „историско катче на медицината“.
Овој простор е осмислен како трајна збирка што ја чува колективната меморија за развојот на македонското здравство. Преку документи, фотографии и медицински предмети се раскажува патот на професијата, нејзините предизвици и постигнатите успеси.
Пред присутните и медиумите, раководството на Комората направи пресек на изминатите три и пол децении, нагласувајќи ја клучната улога на институцијата во зачувувањето на професионалноста, дигнитетот и правата на лекарите, како и во континуираното унапредување на здравствениот систем.
Претседателката на Комората, проф. д-р Калина Гривчева Старделова, истакна дека јубилејот не е само потсетник на почетоците, туку и на одговорноста кон генерациите лекари што ја изградиле и ќе ја градат нашата професија. Историското катче, како што додаде, е израз на почит кон сите колеги што својот живот го посветиле на македонското здравство и оставиле трајна трага.
Беше потенцирано дека Комората и понатаму ќе работи на подобрување на статусот на докторите по медицина, на континуирана медицинска едукација и на градење одржлив и квалитетен здравствен систем.
По официјалниот дел, присутните го посетија новоотворениот простор и се запознаа со изложените материјали. Дел од експонатите се донација од семејството на д-р Ѓорѓи Дудев (1905–1957), еден од првите дипломирани лекари од прилепскиот крај. Тој дипломирал медицина во Белград, работел во Прилеп, Скопје и во повеќе други градови низ државата и активно учествувал во воспоставувањето на здравствениот систем по Втората светска војна. Во знак на благодарност, Комората им врачи благодарница на внуците на д-р Дудев за афирмација на историјата на медицината.
Лекарската комора е формирана на 5 јуни 1992 година, по иницијатива на група доктори од Македонското лекарско друштво. Првата конститутивна седница на Собранието на Комората се одржа во просториите на поранешната Воена болница. Десет години подоцна, Комората доби јавни овластувања за издавање лиценци за работа, организирање полагање стручен испит и акредитација на настани од континуираната медицинска едукација — со што беше воспоставен значаен систем за регулирање на медицинската професија, кој нè приближи до европските стандарди.
