Коригиран пропустот на рекламното пано на влезот во Скопје
Градоначалникот Орце Ѓорѓиевски преку Фејсбук се огласи по реакциите за грешките на рекламното пано поставено на влезот во Скопје. Во фотомонтажата, според критиките, коњот Букефал бил прикажан со пет нозе, претставата на скопското Кале не била верна на оригиналот, а била додадена и црква што не постои на таа локација.
Ѓорѓиевски соопшти дека спорното пано е симнато и поставено е ново. Посочи дека грешки се случуваат кога се работи, но дека најважно е гласот на граѓаните да се слушне и брзо да се реагира. Додаде дека повеќе нема „заборавени“ маала и населби и дека тимот работи посветено и чесно во интерес на жителите.
Тој оцени дека опозицијата нема сериозна тема и наместо конкретни предлози се занимава со ниски страсти. Нагласи дека, ако најголемиот пропуст е печатна грешка, тоа покажува дека градот е на добар пат. Потсети и дека со години не бил обновуван знакот „Добредојдовте во Скопје“, кој сега е заменет со нов. Според него, корекцијата на паното не го чини градот ништо, бидејќи трошоците ги сноси компанијата-изведувач преку ЈП „Улици и патишта“.
Од СДСМ, пак, преку соопштение порачаа дека со погрешното пано градот е нагрден. Тие потсетија на проектот „Скопје 2014“ и обвинија дека, наместо вистинско уредување и инвестиции, повторно се води кампања со AI-генерирани слики, без реални резултати.
Фотографија: спорното рекламно пано што беше предмет на критики.
