Земон за фотографијата со Стојанов: средбата била случајна
Членот на Извршниот комитет на СДСМ, Рубин Земон, се огласи по објавувањето фотографија на која е заедно со Виктор Стојанов, познат по провокативни изјави кон македонскиот народ.
Земон изјави дека средбата се случила случајно, во трговски центар во Софија, пред околу две недели. Според него, додека седел со својот син, му пријдоа неколку лица кои рекле дека го препознале, побарале да седнат на кафе и да направат фотографија. Прво не знаел дека станува збор за луѓе поврзани со фондација, а разговорот бил краток и општ, за случувањата во двете држави.
Тој оцени дека дел од медиумите оркестрирано го напаѓаат, па ги нарече „курирци“. Забележливо е и дека периодот на оваа средба се поклопува со времето кога Земон изјави дека Гоце Делчев е „минорна фигура“ во македонската историја.
Со свое обраќање се јави и Виктор Стојанов, но содржината не се пренесува поради вулгарности, говор на омраза и закани со затвор кон новинари што ја споделиле фотографијата.
Претходно беше објавено дека висок функционер на СДСМ остварил неофицијална средба со Стојанов, поврзан со фондацијата „Македонија“ од Софија. На Стојанов, токму во период на владеење на СДСМ, му беше забранет влез во државата поради ширење говор на омраза против македонскиот народ.
Подоцна, на страницата на организацијата на социјалните мрежи се појави фотографијата со Земон, придружена со тврдење дека тие му даваат поддршка на СДСМ во политичката борба против Мицкоски и дека ќе обезбедат европска поддршка „во име на европската иднина на Северна Македонија и на децата таму“. Објавата набргу беше избришана, но еден медиум ја сочува преку скриншот.
Виктор Стојанов подолг период јавно настапува со негирање на македонскиот народ од Софија, додека професорот Рубин Земон е меѓу поновите кадровски засилувања во раководството на СДСМ.
