Претседателката на Европската централна банка, Кристин Лагард, во својата колумна упатена до „Фајненшл тајмс“ изрази загриженост дека Европската Унија премногу често сама си поставува пречки, дозволувајќи на поединечни земји-членки да блокираат важни реформи.
„Не смееме да дозволиме едно вето да ги спречи колективните интереси на останатите 26 земји-членки“, нагласи Лагард, нагласувајќи потребата од почесто применување на гласањето со квалификувано мнозинство во клучни области.
Според неа, „длабоката промена на глобалниот поредок“ ја отвора можноста за Европа да преземе поголема контрола над својата иднина и да ја следи визијата за „глобално евро“.
„За еврото да го достигне својот целосен потенцијал, Европа мора да ги зајакне трите основни столба: геополитичкиот кредибилитет, економската отпорност и правниот и институционалниот интегритет“, подвлече Лагард.
Таа, исто така, ја повика ЕУ да ја искористи својата позиција како најголем трговски блок во светот за да обезбеди нови трговски договори.
