Ова значи дека е многу можно Сонцето наскоро да произведе суперблесок, кој би можел да ја уништи енергетската мрежа на Земјата и да ги оневозможи сателитите во орбитата, предупредуваат научниците.
Суперблесоците се соларни блесоци кои се околу 50 пати посилни од познатиот настан Карингтон, кој ја погоди нашата планета на 1 септември 1859 година и е најсилната соларна бура забележана во историјата. Тогаш телеграфските системи во Европа и Северна Америка целосно престанаа да работат.
Тим од 10 астрономи предводени од Валериј Василиев од Институтот Макс Планк во Гетинген проучувале 56.450 ѕвезди слични на Сонцето, многу повеќе од кое било друго истражување, пишува SpaceWeather. Податоците беа собрани од вселенскиот телескоп Кеплер помеѓу 2009 и 2018 година.
„Идентификувавме 2.889 суперблесоци во 2.527 ѕвезди слични на Сонцето. Оваа стапка на идентификација покажува дека суперблесоци со енергии поголеми од 1034 ерга се случуваат околу еднаш на век на ѕвезди со иста температура и варијабилност како Сонцето“, велат научниците во студијата објавена во списанието Science.
Научниците знаеле за постоењето на суперблесоци и порано, но мислеле дека таквите настани се многу ретки.
„Суперблесоци во ѕвезди како нашето Сонце се случуваат еднаш на секои 100 години. Тоа е 40 до 50 пати почесто отколку што се мислеше. Суперблесокот е многу поголем отколку што мислевме. Кога станува збор за ова откритие, сите бевме изненадени“, изјави Валериј Василиев за Space.com.
Оваа година Сонцето беше особено турбулентно и неколку соларни бури ја погодија Земјата, што исто така доведе до појава на феномен сличен на поларната светлина на многу пониска географска широчина.
„Не можеме да го набљудуваме Сонцето илјадници години. Наместо тоа, можеме да го следиме однесувањето на илјадници ѕвезди многу слични на нашето Сонце за краток период. Ова ни помага да процениме колку често се случуваат суперблесоци“, рече членот на тимот Сами Соланки.
За време на настанот Карингтон, се објаснува во соопштението, енергијата била само една стотинка од енергијата што би ја имал еден суперблесок. Тогаш беше прекинат телеграфскиот сообраќај, а денес особено ранливи би биле сателитите.
„Најважната подготовка за силни соларни бури е сигурното предвидување на овие настани. На пример, сателитите би можеле да се исклучат во тој момент“, се вели во соопштението.
„Какво би било влијанието на суперблесокот на Земјата? Тоа е добро прашање, и има многу аспекти што треба да се земат предвид. Кое е потенцијалното влијание врз технолошките системи? Како овие настани влијаат на биосферата? Има многу интересни прашања“, рече Василев.
Space.com известува дека студија од 2018 година сугерира дека суперблесок би бил катастрофален за атмосферата на Земјата и животот на планетата. Меѓутоа, три години подоцна друг тим откри дека суперблесоци еруптираат поблиску до половите на ѕвездите и дека ќе има добри шанси да ја промашат Земјата.
