ДУИ бара објаснување од МЕПСО за договорот со „Енергоинвест“
Од опозициската партија ДУИ, побараа објаснување од генералниот директор на МЕПСО, Бурим Латифи, за раскинувањето на договорот со фирмата „Енергоинвест“ од Сараево и склучувањето на нов договор со компанија од Бања Лука, за која, како што тврдат, постојат сомнежи за врски со Милорад Додик. Во ДУИ истакнуваат дека Латифи, кој е братучед на градоначалникот на Чаир, Изет Меџити, е назначен за генерален директор на МЕПСО по семејни и политички основи.
„Тишината на Бурим Латифи е целосно неодговорна. По три дена, тој не обезбеди никакво објаснување пред јавноста за штетата од околу шест милиони евра што ѝ ја нанел на државата“, велат од ДУИ. Тие додаваат дека, по раскинувањето на договорот, арбитражен суд, кој работи според правилата на ФИДИК, ги отфрлил барањата на МЕПСО во вредност од 19,3 милиони евра и признал правото на отштета од шест милиони евра во корист на „Енергоинвест“, средства кои, според ДУИ, ќе треба да бидат исплатени од државниот буџет од кој зависат граѓаните.
Дополнително, од ДУИ истакнуваат дека Надзорниот одбор на МЕПСО изразил негативно мислење за овој потег. „Неприфатливо е во ваква важна ситуација, која се однесува на управувањето со јавни средства и институционалната одговорност, да нема транспарентност и отчетност. Јавноста има право да знае зошто е раскинат договорот со првата компанија и кои се вистинските причини за тоа“, се наведува во соопштението.
ДУИ го повикаа Јавното обвинителство да го истражи случајот, како и Државната комисија за спречување на корупцијата во рамките на своите надлежности. „Институциите мора да одговараат, и не треба да има одложување во постапките“, велат од ДУИ.
