Државата ќе инвестира 17,4 милиони евра: Трескавец, „Илинден“ и Универзална меѓу приоритетите за 2026 година
Буџетот за проекти од национален интерес во културата за 2026 година изнесува 1 милијарда и 70 милиони денари. Овие проекти ќе ја збогатат културната понуда, ќе овозможат нови креативни изрази и ќе придонесат за меѓународната афирмација на македонската култура. Специфично важно е што продолжуваме со систематско зајакнување на националните институции. Минатата година, по првпат, воведовме делегиран буџет за 18 национални установи, а годинава го прошируваме на 28, изјави министерот за култура и туризам на прес-конференцијата, на која беа објавени резултатите од годишните конкурси за културни проекти.
Во 2026 година, особено внимание ќе се посвети на современото творештво, меѓународната соработка и креативните индустрии, кои носат не само културна вредност, туку и значаен економски потенцијал. Преку електронскиот систем за аплицирање, годинава пристигнале вкупно 2618 пријави, а селекцијата се извршила според јасно утврдени критериуми и стручни комисии.
Годинава се обезбедени средства во висина од околу 407 милиони денари за изградба на нови објекти, реконструкција, санација и адаптација на постојните објекти во културата. Меѓу тие проекти се и реконструкцијата на Универзалната сала во Скопје, изградба на објект за Турски театар во Скопје, нов објект за театар и библиотека во Тетово, театар во Струмица и многу други. Дел од средствата ќе бидат наменети и за реновирање на Македонската опера и балет, Музеј на Македонија, како и за реконструкција на старата железничка станица во Стоби, која ќе биде адаптирана во Центар за посетители.
Сите овие активности ќе резултираат со значајно вложување во културното наследство и се насочени кон конзервација и реставрација на важни споменици и археолошки локалитети. Министерот истакна дека ќе се отворат и нови поставки на музеите на праисторијата и османлиското наследство.
Во областа на музичките и сценските уметности, буџетот исто така е зголемен. Македонската опера и балет, како и Филхармонијата, ќе добијат поддршка за реализирање на македонски дела. Оваа година е значајна поради многу јубилеи: 60 години Факултет за музичка уметност, 45 години Скопски џез-фестивал и други.
Во доменот на визуелните уметности, подршка ќе добијат важни јубилејни изложби, а повторно се објавува и конкурс за откуп на ликовни дела по скоро една деценија.
Во делот на литература и издаваштво, поддржани се научни публикации, монографии за значајни автори и културни теми, како и дела на млади автори и детска литература.
Со активностите за меѓународна соработка, македонската култура ќе биде претставена на различни меѓународни настани, како што се саемите на книгата во Лајпциг и Болоња, а македонските театри ќе учествуваат на важни фестивали во соседството.
Овие инвестиции и проекти не само што ќе ја збогатат културната сцена, туку и ќе допринесат за економскиот развој и образованието во Македонија.
