Делегацијата на Европската Унија во Босна и Херцеговина остро ги критикуваше намерите на властите во Република Српска за создавање резервен состав на ентитетската полиција, потенцирајќи дека таквото дејство води кон ескалација на тензиите и подели.
Со новите измени на Законот за внатрешни работи, резервниот состав ќе може да се активира во случаи на јавен неред и во кризни ситуации. Владината коалиција, предводена од Милорад Додик, донесе одлука за усвојување на законот по итна постапка.
Синиша Каран, министер за внатрешни работи на РС, го оправда решението со нагласување на недостатокот од околу 1.000 полицајци од вкупно 5.500. Тој истакна дека резервниот состав нема да надминува 20% од бројот на активната полиција и дека оружјето ќе се носи само во случај на потреба.
Опозицијата реагираше, обвинувајќи го Додик за обид да формира „преторијанска гарда“ за лична заштита и одржување на власт.
Премиерот на Федерацијата БиХ, Нермин Никшиќ, го оцени потегот како „опасен и провокативен“ и најави дека Федерацијата ќе одговори со формирање свој резервен состав. Министерот за внатрешни работи на Федерацијата, Рамо Исак, истакна дека Додик ја губи довербата во активната полиција и сака да ја замени со лојални кадри.
Од страна на ЕУ, беше нагласено дека таквите еднострани потези се контрапродуктивни и се повикаа властите да инвестираат во зајакнување на постоечките полициски капацитети, особено во контекст на преговорите за членство на БиХ во Европската Унија.
Осуда за овие потези дојде и од британската амбасада во Сараево. Амбасадорот Џулијан Рејли изјави дека создавањето резервни сили е непотребен чекор што дополнително ги зголемува ризиците од конфликти. (МИА)
