На 9 декември (вторник) во 19 часот во книжарницата „Литература.мк“ во „Дајмонд мол“ ќе се одржи свечено врачување на наградата „Пегаз“ за 2025 година и промоцијата на победничкиот роман „Кривата Дијана“ од Фросина Пармаковска. За наградата и делото ќе зборуваат Иван Додовски, професор, писател и критичар, како и Бисера Бендевска, уредничка од „Арс Ламина“, двете од членките на жири-комисијата.
На седмиот конкурс за наградата „Пегаз“, што ја доделува издавачката куќа „Арс Ламина“ во партнерство со Фондацијата за унапредување на културните вредности „Славко Јаневски“, пристигнаа 45 ракописи. О конечниот победник одлучуваше тричлено жири составено од Додовски, Бендевска и професорката Соња Стојменска-Елзесер.
Во најдосегашниот избор својата шанса имаа и романите: „Пацер“ од Коста Бојчески, „Изгубени низ дупки во џебовите“ од Ники Борас и „Солдат 1882“ од Добре Тодоровски.
„Кривата Дијана“ (со поднаслов „Роман за верижната вина“) е проза која се занимава со актуелни теми, одразувајќи повеќе од три децении во своеопределено време, но длабочината на своето значење се протега многу подолго, особено кога се мери со последиците од погрешните постапки на поединците во заедницата. Оваа книга нуди увид во колективната несреќа што произлегува од верижната вина на секого од нас, кој премолчел, потклекнал или избегал од обврската да се спротивстави на слабостите на другите.
Како што понорницата ги пробива тромбовите во темната земја, така и нараторот не носи низ мрачните обележја на својата душа, осветлувајќи ја тагата која се обидува да ја скрие. Кога неразјаснетото минато, по многу години, ќе навлезе во сегашноста, пред нас се отвара еден свет што не е само личен; тој е заеднички, слично на несреќите на ликовите на Достоевски, чие ехо не е случајно присутно во овој роман.
