Пакистан ќе продолжи со своите дипломатски напори и обидите за посредување со цел да се стави крај на конфликтот меѓу САД и Иран, и покрај последната ескалација на тензиите во регионот. Ова го соопшти пакистанското Министерство за надворешни работи.
„Пакистан е длабоко загрижен поради актуелната состојба во регионот, која е обележана со новите зголемувања на тензиите. Апелираме до обете страни да се придржуваат кон претходно постигнатиот договор за прекин на огнот“, изјави портпаролот на Министерството, Тахир Андраби, на денешната прес-конференција.
Тој нагласи дека Исламабад останува на ставот дека сите отворени конфликти треба да се решаваат по мирен пат, преку дијалог и преговори. „Сметаме дека дипломатијата и дијалогот мора да бидат водечки принципи за постигнување договорено решение за сите спорни прашања, во согласност со правата и одговорностите на вклучените страни“, порача Андраби.
Изјавата на пакистанското Министерство доаѓа во период на зголемена неизвесност на Блискиот Исток, по последните напади од страна на САД и Иран, што ја доведе во прашање одржливоста на претходно договореното примирје.
Пакистан и досега повикуваше на воздржаност и дипломатско решавање на кризата, изразувајќи поддршка за сите иницијативи насочени кон спречување на поширок регионален конфликт.
