На 11 јуни 1990 година, во Скопје, се роди нашиот значаен театарски, филмски и телевизиски актер, Александар Велјановски. Тој е еден од истакнатите претставници на новата генерација македонски глумци, кој во изминатите години гради впечатлива кариера на сцената, пред камерите и во театарот.
По завршувањето на актерското образование, својата професионална кариера ја започна во Народниот театар „Јордан Хаџи Константинов-Џинот“ во Велес, каде што беше дел од ансамблот од 2012 до 2018 година. Во тој период активно учествуваше во бројни театарски проекти и стана еден од клучните актери на помладата генерација во велешкиот театар. Во 2018 година, се приклучи на ансамблот на Театар Комедија, каде што успешно ја продолжи својата уметничка патека.
Велјановски не застана само на театарот, туку и во телевизиските и филмските проекти. Публиката го памети по улогите во телевизиските серии „Кум“, „Тврдокорни“, „Македонски народни приказни“, „Не Површни“ и детската серија „5+ Фамилија“. Исто така, неговите настапи во филмовите „Љубовница“, „Ругање со Христос“ и „Кино Љубов“ оставија длабок впечаток.
Неговата актерска активност продолжува и денес со бројни проекти на сцената на Театар Комедија. Во последните години, го гледаме во претставите „Вистината“ од Флоријан Зелер и „Ивона, принцезата на Бургунд“, што дополнително го потврдува неговиот талент и актерска зрелост.
Со својот дар, професионален став и неприкосновена работа, Александар Велјановски успешно го поставува своето име во современиот македонски театар и аудиовизуелна продукција.
Редакцијата на „Екран“ му го честита роденденот и му посакува многу здравје, лична среќа и уште многу успешни улоги на сцената и пред камерите.
