Нови Цени на Горивата
По одлука на Регулаторната комисија за енергетика (РКЕ), од полноќ цените на бензините и евродизелот ќе се намалат за два денара по литар, додека цената на екстра лесното масло за домаќинствата ќе опадне за еден денар. Со оваа мерка, просечното намалување на малопродажните цени на нафтените деривати изнесува 2,09 проценти.
Според новите цени, ЕУРОСУПЕР БС – 95 ќе се продава за 73 денари по литар, ЕУРОСУПЕР БС – 98 за 75 денари, додека ЕУРОДИЗЕЛ БС (Д-Е V) ќе чини 66,5 денари. За екстра лесното масло за домаќинство (ЕЛ-1) новата цена ќе биде 65,5 денари за литар. Исто така, цената на мазутот М-1 НС ќе се намали за 0,248 денари по килограм и ќе изнесува 32,635 денари.
РКЕ истакнува дека на светскиот пазар референтните цени на нафтените деривати се намалени во однос на претходната пресметка: бензините за 4,932 отсто, дизелот за 4,357 отсто, екстра лесното масло за 1,790 отсто и мазутот за 1,013 отсто. Курсот на денарот во однос на доларот, по кој беа формирани цените, е намален за 0,1167 отсто.
