Пратеникот од Социјалдемократскиот сојуз на Македонија, Фатмир Битиќи, на денешната седница посветена на пратеничките прашања, истакна дека политиките на актуелната власт сериозно ја ограничуваат мобилноста на граѓаните и доведуваат до зголемување на трошоците за живот. Тој посочи дека, покрај значителното покачување на трошоците за возачка дозвола за категорија Б, граѓаните при патувањето надвор од земјата мора да се соочат и со високите цени на зелениот картон.
Во отсуство на министерката за финансии, Гордана Димитриеска-Кочоска, до која беше насочено прашањето, Битиќи побара писмен одговор за тоа кога ќе се укине зелениот картон и дали ќе се стави крај на оваа финансиска бариера за мобилноста на граѓаните.
„Ако за првото прашање говорев за тоа како државата ги поскапува трошоците за мобилноста на младите, сега морам да посочам дека истиот тренд на ограничување продолжува и откако некој граѓанин ќе добие возачка дозвола. Наместо да се олесни движението на луѓе и идеи, државата поставува нови пречки, а тоа е зелениот картон. Тој претставува постојан трошок за напуштање на земјата, а во исто време е и симболична и финансиска бариера што ја плаќаат студентите од програмата „Еразмус“, сезонските работници, медицинските лица во обуки во странство, семејствата кои сакаат да патуваат за викенди, како и малите компании кои се ангажирани во извоз“, рече Битиќи.
Тој додаде дека овој „данок на мобилност“ е само дел од пошироката политичко-економска матрица на Владата.
„Овој „данок на мобилност“ не е изолиран куриозитет, туку дел од истото политичко-економско опкружување што го увидуваме во Предлог-буџетот за 2026 година, што е популистичка реторика за „грижа“, но всушност подразбира залагање за лесни приходи, непродуктивни трошоци и административна удобност, наместо структурни реформи и интеграција во Европа“, додаде Битиќи.
Тој понатаму нагласи дека трошоците за живот постојано растат поради погрешните политики на власта, а граѓаните ги чувствуваат тие последици.
„Кога власта предводена од ВМРО-ДПМНЕ се фали со ‘дисциплина’, а истовремено пробива фискални правила и го намалува инвестирањето, граѓаните тоа чувствуваат на најдоследен начин, преку секој дополнителен трошок кој ги обременува во правото на движење, работа, учење и поврзување. Зелениот картон, во оваа контекст, е политика што ја прави границата поскапа, ограничувајќи ја економската шанса на малите и демотивирајќи ги токму оние кои ја поттикнуваат економијата со својот труд“, рече Битиќи.
Исто така, Битиќи нагласи дека мобилноста е јавен интерес, а не привилегија. Како резултат на високите бариери за движење на луѓе, знаење и труд, државата не гради европска економија, туку затворен круг на ниска продуктивност и висока фрустрација.
„Ако навистина сакаме да ги задржиме младите дома, мораме да им дадеме шанса на малите извозници и да го олесниме животот на работниците и на дијаспората. Време е да престанеме да ја претвораме границата во финансиска пречка“, заклучи Битиќи.
