Возачот на Мерцедес, Андреа Кими Антонели, триумфираше на трката за Големата награда на Мајами. Зад младиот Италијанец се пласираа возачите на Мекларен, актуелниот првак Ландо Норис и Оскар Пјастри.
Нив ги следеа Џорџ Расел (Мерцедес), Макс Ферстапен (Ред Бул), Шарл Леклер (Ферари), Луис Хамилтон (Ферари), Франко Колапинто (Алпин), како и Карлос Саинц и Алекс Албон, кои се натпреваруваа за Вилијамс.
Со оваа победа, Антонели ја зголеми својата предност во генералниот пласман и со три последователни победи постигна 100 поени. Тој стана првиот возач во историјата кој ги освои првите три победи откако претходно успеал и на пол-позициите.
Трката започна три часа порано поради страв од дожд, а самиот почеток донесе хаос.
Ферстапен, при контактот со Леклер во втората кривина, се заврте и од втората позиција падна на деветтата, додека Леклер водеше. Во шестиот круг беа видени два инцидента, при што Исак Хајар и Пјер Гасли ја завршија трката.
Ферстапен прв реагираше менувајќи гуми и падна на 17-та позиција, но потоа почна да се искачува кон врвот.
Сепак, на средина од трката беше јасно дека борбата за победа ќе биде меѓу Норис и Антонели. Италијанецот, со одлична тимска тактика, во 39-от круг го презеде водството и не го испушти до крај, и покрај силниот притисок од Норис до 36-от круг.
Ферстапен добро се држеше и покрај истрошените гуми, но на крајот ривалите го престигнаа. Најпрвин поминаа Леклер и Пјастри, а потоа и Расел.
Во последните кругови имавме борба за подиумот. Пјастри го мина Леклер, кој направи голема грешка, се заврте на патеката и допре до ѕидот, што му овозможи на Расел и Ферстапен да го претекнат.
По четири трки, лидер во генералниот пласман е Андреа Кими Антонели со 100 поени, неговиот тимски колега Џорџ Расел е втор со 80 поени, Шарл Леклер е на трето место со 63, а Ландо Норис на четвртото со 51 поен.
Следната трка ќе се одржи за три недели во Монтреал, Канада.
