Амбасадата на Соединетите Американски Држави во Србија ги предупреди своите државјани да се држат подалеку од местата во Белград каде денеска се предвидени протести и собири. Тие исто така споделија важни безбедносни препораки.
– Ако се најдете во близина на некакви собири или насилни ситуации, веднаш напуштете го тој простор. Доколку тоа не е возможно, побарајте безбедно засолниште, се наведува во безбедносното известување на американската амбасада.
Покрај избегнувањето на ризичните области, амбасадата им советува на своите државјани редовно да ги следат локалните медиуми, да останат во затворени простори, да подготват доволно запаси на храна и вода, како и да имаат планови за евакуација или безбедно засолниште во случај ако евакуацијата не е возможно.
Исто така, американските државјани се охрабруваат да се обратат до амбасадата и да се регистрираат во програмата „Smart Traveler Enrollment Program“ (STEP) за да бидат во тек со важни известувања.
Тие истакнаа дека се очекува дека на протестите ќе присуствуваат десетици илјади луѓе и дека активностите може да се одвиваат на повеќе различни локации. Полицијата предвидува значителен метеж, затворање на мостови и улици, како и застои во сообраќајот, а постои и можност за прекини во мобилната телефонија.
Денеска во Србија се одбележува Видовден, а за време на денот се најавени различни настани — протест на студентите, литературна вечер пред Народното собрание, доделување одликувања, како и свечена седница на српската Влада во Крушевац.
