Редовните здравствени контроли се клучен аспект од грижата за лица со дијабетес, бидејќи преку нив се следи прогресијата на болеста, се оценува општата здравствена состојба и се утврдува вистинската терапија за успешно управување со дијабетесот во секојдневниот живот.
Исто така, навременото организирање на прегледи за рано откривање, следење и третирање на компликациите од дијабетесот е од одлично значење за подобрување на квалитетот на живот и достојството на пациентите.
Изразуваме наша длабока загриженост во врска со ограничената доступност на специјалистички термини за прегледи и иницираме иницијатива за унапредување на постоечките процедури за закажување прегледи, како и за зголемување на достапноста на континуирана здравствена грижа за хронично болните.
Посебно внимание заслужува фактот дека околу 4.000 лица со тип 1 дијабетес своите прегледи ги извршуваат на универзитетските клиники во Скопје — приближно 650 деца на Универзитетската клиника за детски болести и околу 3.550 пациенти на Клиниката за ендокринологија, дијабетес и метаболни нарушувања.
Дополнително, во многу општини во државата недостасуваат специјалисти дијабетолози, поради што многу пациенти се принудени да патуваат во други града и регионални центри за здравствени услуги. Ова создава дополнителен финансиски, организациски и психолошки товар за лицата со дијабетес и нивните семејства.
Националната програма за дијабетес 2018–2028 ги поставува стратешките цели за поквалитетна и поефикасна превенција, рана детекција и подобрување на квалитетот на грижата за пациентите со дијабетес мелитус. Тие цели охрабруваат подобра контрола на болеста и превенција на компликации, со редовно следење и извештавање за резултатите од спроведените активности.
Овој план е од особена важност за лицата со дијабетес, бидејќи целта е да се подобри квалитетот на животот, контрола на гликемијата и намалување на хроничните компликации.
Веруваме дека заедничка координација и институционален ангажман може да доведат до одржливи решенија, кои би обезбедиле подобар и поконтинуиран пристап до здравствена грижа за повеќе од 140.000 лица со дијабетес во Македонија.
Здравствениот систем мора јасно да изрази дека превенцијата и навремената здравствена грижа се основни права на пациентите, а не привилегија.
Сојузот на здруженија на лица со дијабетес во Македонија останува ангажиран во создавањето одржливи решенија, преку соработка со надлежните институции во термин кој ќе биде заеднички договорен. Наша цел останува да оствариме дијалог со релевантни чинители, за подобрување на квалитетот, достапноста и континуитетот на здравствената грижа за лицата со дијабетес.
