Постапка против три лица за спречување службено лице
Основното јавно обвинителство Крива Паланка започна постапка против три лица за кривично дело – спречување на службено лице во вршење службени дејствија, согласно член 382 став 3 во врска со ставовите 1 и 2 од Кривичниот законик. Осомничените, татко и двете негови ќерки, на 2 декември со употреба на сила и сериозни закани, спречиле службени лица од Агенцијата за храна и ветеринарство, со полициска асистенција, да спроведат правосилно и извршно решение за одземање домашни животни – крупен добиток.
Јавниот обвинител, со оглед на опасноста од бегство и ризикот од повторување на делото, до надлежниот суд поднесе предлог за определување мерка притвор за сите осомничени. Според обвинителството, од нивното однесување произлегува дека, и покрај сите досегашни напори од страна на многубројни надлежни државни органи, осомничените повторно малтретираат месното население и соседите, и сега преземаат дејствија за спречување на вработени од надлежните институции, вклучувајќи и инспекциски служби од Агенцијата за храна и ветеринарство, како и униформирани полициски службеници.
