Поранешниот премиер Никола Груевски,во својата најнова објава на Фејсбук,изрази сериозни критики кон правосудниот систем во Македонија,нагласувајќи дека темелни и суштински реформи не се можни доколку не се расчисти со оние кои,според него,биле дел од политичките прогони во изминатите години. Тој смета дека судството и обвинителството во земјата биле подложни на влијание од политички и надворешни моќни центри, користејќи методи на притисок и уцени за да се добијат лажни сведоштва и да се извршат политички мотивирани судски процеси.
Во објавата, детално го објаснува начинот на кој, според неговите тврдења, функционирал овој систем. Тој тврди дека процесот започнувал со идентификација на лица кои требало да бидат цел на обвиненија,а потоа се применувале различни форми на манипулација и притисок врз сведоците,вклучително и закани,за да се добијат изјави кои ќе ги поддржат веќе утврдените обвиненија.
Механизам за политички мотивирани случаи
Груевски објаснува дека сè започнувало со подготовка на „црна листа“ на личности кои биле предвидени за гонење од политички причини. Во зависност од нивните занимања – независно дали биле бизнисмени, поранешни функционери или јавни личности – се барале правни или администранивни слабости кои можеле да бидат искористени за притисок.
Понатаму,како што наведува,обвинителите користеле тактики на манипулација,започнувајќи со доближување и стекнување доверба на потенцијалните сведоци,а потоа,доколку не соработувале,се вршел притисок преку закани. Тие што не сакале да дадат изјави според очекувањата биле соочени со опасност сами да бидат обвинети, или нивните семејства да бидат таргетирани.
„Најранливите категории сведоци подлегнуваат на овој притисок, прифаќаат конструирани изјави и потоа, од страв, продолжуваат да ги повторуваат и пред судот“, истакнува поранешниот премиер. Тој дополнува дека во најтешките случаи, обвинетите биле сместувани во притвор под неподобни услови, а потоа им се нудела погодба – доколку прифатат да дадат „соодветни“ сведоштва, можеа да добијат поблаги казни или да бидат ослободени.
Последици по државата и граѓаните
Неговото мислење е дека овие методи довеле до целосно разнишување на правосудниот систем, нанесувајќи значителна штета на македонското општество. Тој предупредува дека, ако не се спроведе длабока истрага и не следува одговорност за оние кои биле дел од политичките прогони, истите методи ќе продолжат да се применуваат и врз идните политички неистомисленици.
Тој подвлекува дека Македонија плаќа висока цена за неправдата што ја трпела во изминатите години. Доколку не се направи целосно прочистување на системот, ваквите практики можат да бидат повторени, без разлика која партија ќе биде на власт.
„Ако се сопре ова, но извршителите не сносат никаква одговорност, тогаш неправдата не е ставена крај, туку само привремено запрена“, пишува Груевски, додавајќи дека некои од странските поддржувачи на овие методи сега започнуваат истраги во нивните сопствени земји.
Итноста од вистински реформи во правосудството
Како заклучок, Груевски нагласува дека нема да биде можно вистинско реформирaње на правосудниот систем, сè додека судиите и обвинителите кои учествувале во вакви процеси не бидат повикани на одговорност. Според него, само преку прочистување од коруптивни и политички мотивирани лица во судството, може да се воспостави праведен и непристрасен систем.
„Само со темелно отстранување на коруптивните и политички инструирани лица од судската и обвинителската сфера, може да се создаде правна држава во која законите ќе бидат над политичките интереси“, заклучува поранешниот премиер.
Со оваа објава, Груевски испраќа јасна порака дека борбата за правда не е завршена и дека иднината на македонското судство ќе зависи од тоа дали ќе има разрешница за неправдите од минатото.
