Подобрување на Соработката за Спречување на Корупцијата во Град Скопје
Со овој меморандум, градоначалникот Ѓорѓиевски најавува продлабочување на соработката помеѓу Град Скопје и НДИ, насочена кон навремено идентификување, намалување и спречување на корупцијата во градската администрација.
„Ова е значаен чекор кон создавање поефикасен, попристапен и одговорен систем. Граѓаните заслужуваат институции кои функционираат на транспарентен и чесен начин, со јасни процедури и поголема отчетност, со што ќе се намали простор за злоупотреби. Со оваа соработка, Град Скопје ќе добие стручна поддршка за развој на внатрешни процедури и механизми за превенција од корупција, како и за јакнење на капацитетите на градската администрација преку специјализирани обуки,“ изјави градоначалникот.
Целта е да се подобри способноста на администрацијата да ги препознава, спречува и пријавува коруптивните практики.
„Ако работиме на зголемување на транспарентноста преку објавување податоци и информации, како и на дигитализација на услугите, тоа ќе ја зајакне ефикасноста и ќе ја подобри достапноста за граѓаните, минимизирајќи ги ризиците од корупција. Овој меморандум вклучува и унапредување на соработката помеѓу Град Скопје, другите општини и со државните институции, граѓанските организации и медиумите, за создавање цврст систем на интегритет и одговорност, како на локално, така и на национално ниво. Изразувам благодарност до НДИ, Швајцарската конфедерација и Шведска за поддршката на овој значаен проект. Наша цел е Град Скопје да функционира чесно, отчетно и согласно интересите на граѓаните,“ заврши градоначалникот Ѓорѓиевски.
