Илјадници граѓани протестираат шести ден по ред пред седиштето на албанската влада во Тирана. Тие се противат на контроверзниот туристички проект во заштитеното подрачје Звернец и бараат оставка од премиерот Еди Рама. Протестите, исто така, се прошириле на други градови, како што се Валона, Драч и Елбасан, а поддршка пристигнува и од албанската дијаспора во САД и Германија.
Во централниот фокус на спорот е луксузен туристички проект поврзан со Џаред Кушнер, зетот на поранешниот американски претседател Доналд Трамп. Овој проект предвидува развој на туристички комплекс на островот Сазан и дел од јужното албанско крајбрежје, преку инвестицискиот фонд „Афинити партнерс“, основан од Кушнер. Владата на Албанија му даде статус на „стратешки инвеститор“ на проектот, што овозможува забрзано добивање на дозволи и согласности.
Демонстрантите тврдат дека нивниот протест не е само за Звернец, туку и за иднината на целата Албанија. Тие упатуваат повици за оставка и од премиерот Еди Рама и од опозицискиот лидер Сали Бериша.
Во одговор, Рама ги отфрли обвинувањата и изјави дека протестите се дел од „хибридна војна“ против Албанија. „Тоа не е еколошко прашање, туку хибридна војна. Зад протестите стојат Иранци, кои веќе биле активни во слични напади“, изјави Рама на самитот ЕУ – Западен Балкан во Тиват. Во интервју за еден медиум, тој истакна дека противењето на проектот се поттикнува од ботови, лажни профили на социјалните мрежи и надворешни актери кои ја манипулираат загриженоста за животната средина.
Освен тоа, Рама негираше постоење на каков било таен договор поврзан со проектот. „Се шири приказна дека има таен договор помеѓу мене и Бенјамин Нетанјаху преку Џаред Кушнер. Тоа е целосна измислица“, нагласи тој.
Албанскиот премиер додаде дека конечниот проект сè уште не е доставен до институциите и секој идниот предлог ќе биде подложен на јавна расправа и законски процедури. И покрај растечкиот притисок од улицата, Рама нагласи дека протестите нема да ја одредат судбината на инвестицијата. „Тоа никогаш нема да се случи. Не додека јас сум на власт“, заврши тој.
