Препознајте ги и избегнете ги: Замките зад снижените цени

СПОДЕЛЕТЕ

Комерцијалистите се ѓаволски добри во измислувањето на разноразни трикови за да ве намамат да пуштите срце и да потрошите што повеќе пари. Било да се некакви потрошувачки поени, купони, начинот на кој ги рекламират производите или разни техники на „попуст“, тие се експерти кога треба да ви влезат во мозокот и да влијаат на вашите купувачки навики и одлуки. Ова се некои од најпопуларните продажни трикови кои се користат во трговијата:

 

ЦЕНОВНИ МАМКИ
Оваа техника се користи со цел да се „подбутнат“ потрошувачите да купат одреден модел што им носи многу профит. На пример, во продавниците на Apple веќе со години ја користат оваа техника, која влијае на потрошувачите да фрлат пари на продукт кој изгледа како да има одлична вредност за цената, спореден со останатите и многу поскапи модели. Така, во моментов, Apple Watch е достапен во 38 различни дизајни, чија цена варира од 349 до 17.000 (да, илјади) долари. Се разбира, најскапите модели никогаш нема да бидат на врвот на листата на најпродавани, но тоа не им е ни работа. Пред сé, задачата на нивното постоење е да ги направат верзиите од 300-500 долари да изгледаат како добра зделка во однос на вредност-цена. Така, потрошувачите кои инаку никогаш не би дале 300 долари за паметен часовник не се така „скржави“ кога алтернативата е 17.000 долари.

 
ВИСОКО-НИСКИ ЦЕНИ (И КУПОНИ)
Ваквото ценување се случува кога продавачите воведуваат релативно висока „редовна“ цена на производите, која потоа ја снижуваат преку купони или разни промотивни настани, за да направат да изгледа дека правите добра зделка. Иако никогаш нема да признаат, вистината е дека тие не очекуваат да го купите производот по таа вештачки зголемена „редовна“ цена, туку да ви го продадат по безмалку вистинската редовна цена, која инаку вие би ја сметале за висока, а сега е „добра зделка“.

Ваквата пракса е честа и во интернет трговијата. Многу од веб-сајтовите, пред да пуштат во оптек купони со попуст, значително ги качуваат цените, за потоа да ви изгледа дека со купонот заштедувате голема сума.

 
ДИНАМИЧНИ ЦЕНИ
Динамичното одредување на цената вирее на Интернет. Во основа, значи дека продавачите одредуваат цена лично за вас, врз основа на вашата историја на пребарување и онлајн-купување, па дури и физичката локација. На кратко, со овие методи продавачите се обидуваат да проценат колку всушност сте во можност да платите, користејќи податоци како тоа колку често купувате по редовна цена, какви типови на производи пребарувате и колкава е куповната моќ во вашиот регион. Amazon е само една од морето веб-компании кои ја користат оваа тактика за да го максимизираат својот профит.

Ова може лесно да го тестирате. Ако цената на продуктот кој често го ѕиркате на Интернет често се менува, веројатно ве манипулираат. Проверете така што ќе пребарувате во „incognito mode“ (CTRL+SHIFT+P за Mozilla, CTRL+SHIFT+N за Chrome) или ќе ги исклучите third-party колачињата во сетинзите на пребарувачот. Така, онлајн продавачот ќе нема увид во вашите интернет навики, па нема да може да ги искористи против вас. Друг начин е да ја проверите цената преку мобилниот телефон. Многу од продавачите ќе наведат различни цени, во зависност од тоа дали пребарувате од мобилен, од компјутер или од таблет.

 
ПРЕСТИЖ ЦЕНИ
Поскапо мора да значи и поквалитетно, нели? НЕ! Оваа е честа стратегија чија задача е да ве натера да помислите дека штом цената на одреден продукт е многу повисока, мора да се работи за супериорен квалитет во однос на поевтините верзии. Некогаш е така, ама некогаш не е. Ова е чест случај кај парфемите, накитот, па дури и новите автомобили. Кога ќе налетаме на евтин или парфем на попуст, нашата иницијална реакција е да се запрашаме што не е во ред со него, па затоа и најчесто ги пропуштаме таквите понуди. Слично е и во автомобилската индустрија, особено во сферата на луксузните модели – така, Нисан и Инфинити: и двата автомобила се произведени со истата шасија и мотор, но Инфинити има „престиж цена“ како последица на неколку небитни екстра „сијалички и звончиња“, што би се рекло.

 
ШАРМ ЦЕНИ
Ова е очигледно – поентата е да мислите дека цената е пониска отколку што всушност е. Секогаш кога ќе видите цена од 199.99 или 4.97, продавачите се обидуваат да ви го прелажат мозокот така што ќе наведат цена незначајно пониска од цел број. Бидејќи читаме од лево кон десно, ги гледаме првите цифри во бројот и веднаш заклучуваме дали цената е прифатлива или не. Колку и да изгледа очигледно или бесцелно, според една студија на Journal of Consumer Research, овој ефект на „левите цифри“ има решавачки удел при куповните одлуки, во самиот момент на купувањето.

 
ПОПУСТИ
Се разбира, постојано наидувате на елаборативни и „гласни“ табли близу влезот на продавниците, кои ве известуваат дека одредени продукти се на продажба по екстра-снижена цена. Ова претежно се производи кои воопшто сте немале ни намера да ги купите, но по таа нова ниска цена, одеднаш стануваат производи без кои не можете. Дури и да не наседнете од прва, главната намена на овие дисплеи е да ве натераат да влезете во продавницита и да завршите купувајќи повеќе производи по редовна цена.

 

АСОЦИЈАЦИИ
Обично, продавниците ќе стават големи стикери кои индицираат дека некој производ се продава на попуст. Обично овие знаци се со црвени букви и ја имаат редовната цена која е прешкртана, а до неа е новата пониска цена со здебелени букви. Кај некои продавници, ќе забележите исти вакви табли и за некои други производи, но на нив е наведена само редовната цена, со големи црвени букви. Поентата е да ве измамат да помислите дека и тој производ е на попуст, а всушност се продава по редовна цена.

 
Трговијата прерасна во модерна психолошка војна, во која таргет се вашите пари. Сите сакаат добра зделка, но важно е да се осигурате дека навистина правите добар пазар. Секогаш истражувајте самостојно, читајте рецензии од други купувачи и имајте ги на ум триковите со кои продавачите се служат.

- Реклама -