Вака изгледа „затворот“ на Мурињо во Манчестер

Порано неделава, Жозе Мурињо изјави дека неговиот животот во Манчестер му е катастрофа, алудирајќи на неуморните папараците кои го следат насекаде низ северниот англиски град. Во интервјуто за британскиот весник Daily Telegraph, во вторникот, Мурињо се пожали дека е принуден да седи затворен во хотелската соба и дека не смее дури ни да пропешачи слободно по улица.

Ова признание го поттикна Daily Telegraph да се заинтересира како точно изгледа овој „затвор“ на познатиот тренер, кој престојува во хотелот Lowry – хотел со пет ѕвезди во Манчестер. Иако од хотелот не потврдуваат која е собата на Мурињо, британскиот дневен весник прави интересна претпоставка: Каде би престојувал човек со годишна плата од 13.8 милиони фунти?

„Само на најдоброто можно место“, теоретизира весникот. А во Lowry Hotel, тоа е Charles Forte Suite – луксузен апартман со површина од 145 метри квадратни, со сопствена трпезарија, спална, бања во италијански стил, и други удобности. На сајтот на хотелот, апартманот е дефиниран како „најлуксузното место за престој во Манчестер“. Ноќевање во апартманот чини 2100 фунти (околу 2.570 долари).

Daily Telegraph баш детективски му се вдал на „случајот“. Така на пример, открива дека следниот датум на кој апартманот ќе биде слободен е 2 ноември – токму кога тимот на Манчестер Јунајтед ќе лета кон Турција за натпреварот од Лига Европа со Фенербахче. Па, по сé изгледа, случајот „Каде престојува Мурињо“ е решен.