Месото што го јадеме е полно со антибиотици

СПОДЕЛЕТЕ

Научниците од универзитетот Принстон утврдија дека сé поголемата глобална побарувачка на месо предизвикува сé почеста употреба на антибиотици при одгледувањето на живината и стоката. Се поставува прашањето: Како тоа влијае на здравјето на луѓето што го јадат месото?

Извештајот од студијата е објавен во магазинот Proceedings of the National Academy of Sciences. Во него се наведува дека антибиотиците се употребуваат од две причини; Првата е што со нивна помош, стоката побрзо добива на телесна маса. Втората е што се неопходни за да се сочува здравјето на животните, благодарение на лошите услови во кои се одгледуваат.

„Луѓето се сé побогати и сакаат да јадат повеќе месо“, објаснува Томас ван Бекел, епидемиолог на универзитетот Принстон и автор на истражувањето.

Така, во 2010-тата, фармерите ширум светот употребиле повеќе од 63.000 тони анитибиотици при одгледувањето на стока и живина, а оттогаш оваа бројка постојано расте. Се очекува дека во 2030-тата година употребата на антибиотици ќе достигне 105.000 тони.

Јадењето на месо со антибиотици не поминува без одредени ризици по здравјето на луѓето. Имено, консумирањето на вакво месо создава отпорност на тие антибиотици, а тоа значи дека подоцна, заштитата од одредени бактерии ќе биде потешка и дека антибиотиците нема да ни бидат така ефикасни сојузници. Згора на тоа, а можеби и најстрашно, е што може да дојде до мутација на микроорганизмите, т.е. формирање на супербактерии, кои и самите би развиле отпорност на антибиотиците.

„Ако нешто се промени, тоа ќе се случи само затоа што потрошувачите ќе бараат квалитетни и безбедни производи, како што е органската сланина“, смета ван Бекел. „Но, се разбира, не може секој да си приушти таква храна“.

- Реклама -